作者:沙龍娛樂

来源:http://sp1388.net/160/.html

英超球隊利物浦最近將球隊核心古天奴放售,讓呢位巴西中場以1.46億英鎊轉會費加盟西甲巴塞隆拿。隊中另一名巴西兵法明奴似乎對於同鄉離隊感到心灰意冷,而利物浦就希望能同佢開展續約談判,希望佢可以長期留效,畢竟紅軍經不起再有另一名球星出走。

https://i.imgur.com/EkCxNqz.png

26歲嘅法明奴喺2015年由德甲嘅賀芬咸,以2,130萬英鎊轉會費加盟利物浦,佢本來主要出任進攻中場居多,但後來喺紅軍被改造為正箭頭,一番適應之後漸見進步,今季喺各項賽事上陣30場,收獲16個入球及8個助攻。

法明奴喺早前足總盃對愛華頓前,接受《Sky Sports》訪問,表示自己十分熱愛喺利物浦嘅生活,亦都希望可以留效更長時間。不過,當時古天奴仍未正式宣佈轉會,雖然作為好友兼同鄉,法明奴好可能一早就知道古天奴嘅去向,但佢喺好兄弟離隊之後,喺Instagram上面發表感性長文,似乎有啲心灰意冷嘅味道,佢話「冇咗你之後,利物浦已經唔再一樣喇。」

跟據《Sky Sports》報導,法明奴嘅合約將會喺2020年到期,利物浦唔願意失去呢位球星,所以將會向佢開出一張長約,希望佢可以長期留隊,不過就冇透露合約年期。不過《Telegraph》就報導,利物浦開出嘅係「終身合約」。

 

https://i.imgur.com/bm0Reas.jpg

《Telegraph》表示,紅軍喺出售古天奴之後,得到大筆轉會費,佢哋希望可以藉此加強現有嘅陣容,同時都要留住現有陣容嘅核心人物,而球會表示唔會再好似高普嘅舊東家多蒙特咁,不斷出售球隊嘅核心,特別係法明奴、文尼同沙拿呢三位進攻球員。早一步來投嘅法明奴,理所當然成為優先嘅續約目標,《Telegraph》更指紅軍會開出「終身合約」,希望26歲嘅法明奴可以一直留效到退役為止。

早前,巴塞隆拿同恩尼斯達簽下「終身合約」,不過呢個對於33歲嘅巴塞隊長嚟講,係一份榮譽多於實際嘅「鐵飯碗」保障,而且恩尼斯達出身於巴塞拉瑪西亞青訓營,係效力球隊多年嘅傳奇級老臣,先可以得到呢個待遇。只係第三季效力紅軍嘅法明奴,尚未建功立業,配唔配得到一份「終身合約」呢?個人認為答案係否定嘅,如果利物浦真係有呢個決定,都幾不可思議。